سويت يوم الخميس الصباح خبز تنور فقلت بشارككم خبزي خصوصا أنه بتنور الغاز ومواضيع البنات هنا في تنور الحطب
تنور الغاز نشتريه من الأسواق الشعبية وسعره 450 الصغير و 650 الكبير
او من اليمنيين مباشرة يجون كل فترة يبيعونها الصغير ب350 والكبير ب 500
لأنه يصنع في اليمن ونستوردة منهم
أشتريته وخليته في الدرج الخلفي للبيت مدخل ماحد يدخل منه خاص بالحديقة ومكانه مناسب قريب من المطبخ
وهذي صوره له من الداخل بعد مصنوع من مادة الشنكو المقاومة للصداء يعني من ناحية صحي فافضل من تنور الطين
لانه يلصق فيه احيانا بعض الطين ويمتلي ابخرة الدخان من الحطب لكن هذا صحي
مع اني افضل نكهة تنور الحطب
وخبز تنور الغاز يطعي نفس النتيجة وبدون ماتنحرقين من حرارة الحطب وشكل حلو ومرتب
نجي الحين للطريقة مع طريقة تبخير اللبن الروب حتى يصير طعمه نفس طعم لبن الجدات
الطريقة والمقادير :
نعجن مقادير متساوية من دقيق البر النخالة والدقيق الأبيض الممتاز أنا عجنت 3كوب كبير من كل نوع تكفي الكمية 6 أقراص
ونحط مع الدقيق ملعقة كبيرة ونصف خميرة فورية وتخلينها من ساعة الا ساعتين تخمر بعد عجنها بالماء حتى تكون عجينة تميل للقاسية اكثر من اللينة يعني متماسكة والعجن مزبوط ولو عندك عجانة افضل بعد وتخمر بسرعة وغطيها بكيس بلاسيك وخليها تخمر
في هذا الوقت جهزي الي بتحطينه مع الخبز
أنا سويت كاري دجاج وسمن ولبن (مكبا) يعني مبخر بالدقيق وهذي طريقته
نشعل الفحم السريع
وبعدها نغسل جك اللبن الزجاج مايصلح بلاستيك للبن والغسل من أجل يلصق الدخان لدقيق فيه
وبعدين نحط الجمر في صينية معدنية صغيرة بهذا الحجم
ونحط فوقها ملعقة دقيق اي نوع
وبعدين على طول نقلب جك اللبن فوق الدخان
ونخليه لين يخلص الدخان
وبعدين نصب اللبن وسطه بهذي الطريقة حتى نحافظ على الدخان ويمسك باللبن مزبوط
استخدمت لبن اكتيفيا قليل الدسم لانه لذيذ طبعا هذي الطريقة تخلي طعم اللبن زي طعم لبن الجدات زي لبن زمان للي يحبونه ويخافون من الامراض