ولادتي في الحبيب التخصصي عند د.نائلة نيصار

.



السلام عليكم جميعاً ❤



حبيت احكي لكم عن تجربتي الأولى بالولاده في مستشفى الحبيب التخصصي والأهم تجربتي مع دكتورتي الرائعة د.نائلة نيصار استشارية نساء وولادة ، د.نائلة باكستانية عندها جنسية بريطانية ، ولما كنت ابحث بالنت قبل ما اختارها ماكان احد ابد ذاكر تجربته معاها عشان كذا حابه افيدكم ()

بحكي أول شي عن اختياري للمستشفى من عدة نواحي : مكانه ، امكانياته ، الطاقم كامل ، سمعته وبالاخير دكتورتي 

يمكن الغالبية يعرفون ان مستشفى الحبيب التخصصي هو الفرع الجديد لمجموعة مستشفيات الحبيب ف عشان كذا انا اخترته ولأنه من أقرب المستشفيات لبيتي ، ومن ناحية اماكنيات المستشفى فهي جداً ممتازه مع التحفظ على أسعارهم في بعض الأمور لكن الحمدلله على نعمة التأمين :) .
وبالنسبة لدكتورتي كنت أفضل دكتوره أجنبية ولها خبرة بالأجهاض لأني سقطت مرتين قبل حملي هذا وكان اختياري د.نائلة والحمدلله جداً ارتحت لها أنسانة خلوقة ودينه ومصلحة المريضة فوق كل شي ، وبديت مراجعة معاها كل اسبوعين عشان تتطمن عالبيبي ، ماراح أطول بالكلام وببدأ احكي لكم عن يوم ولادتي واللي حاليا لي شهر ونص تقريبا من ولدت ولله الحمد لاني حابه افيد أي بنت حامل ومحتاره باي مستشفى وعند اي دكتوره تبي تولد وما أبي الا الدعاء بس 🌷 


بالأول عندي كم نصيحة :
• خليك مطلعه على علامات الولادة و طرق التنفس وتمارين تسهل عملية الولادة مثل تمرين الحوض و السكوات بالاضافة للتمر ثم التمر ثم التمر وعادي اي نوع يمشي الحال ويفيد وبخصوص المشي ترا مش ضروري اذا كنتي تعانين من ألم بالركبه او الظهر وعوضيها بالتمارين الثانية .
• وكمان طول فترة حملك لازم تتهيأين نفسياً لكل شي يصير بعد الولادة مثلاً من خياطة او صحة او رضاعه و مراعاة لهذا الكائن اللي ماله لا حول ولا قوة و كبر المسؤولية اللي راح تتحملينها
• وكمان شغله بسيطة بخصوص الرضاعه ( لازم لازم ترطبين الحلمات طول فترة حملك او عالاقل من بعد الشهر الخامس عشان لا تتعرضين لتشققات او جروح تأثر عليك وتوجعك ) 
• شنطتك وشنطة البيبي ابدأي تجهيزها من الثامن على مهلك الا اذا كان في بوادر ولادة مبكره ف يفضل من قبل .
• تفرجي على مقاطع ( رولا قطامي أخصائية أمومة وطفولة ) جداً كلامها مفيد وراح يكون عندك خلفية كويسه قبل الولادة .
• لما تحسين بالطلق تقاربت مدته كلي واشربي مويه لان بعدين راح تجهدين نفسك ف لازم تتغذين او اقلها تمر و مويه 
• لاتسمعين كلام سلبي من أي شخص حتى لو كان قريب منك لان كل شي بتسهيل وتيسير من ربك والدعاء والاستغفار خليهم على لسانك دايم و خليك مبسوطه وسعيدة لان ربي بيعطيك أحلى وأجمل هدية بالدنيا ( طفلك ) . 


امممممم ابدأ لكم من أول الطلق ، الطلق يختلف من وحده لوحده وكثير قريت انو يشبه ألم الدورة لكن أشد بس اللي جاني مثل المغص اللي يجيك من بداية التاسع على أقوى وماسكني من بطني لين جنوبي وشوي ع جهة ظهري ف شكيت بالاول وكنت بين مصدقة ومكذبه لان قومني من النوم وبعدين اللي خلاني اتأكد انو طلق شفت وانتوا بكرامه افرازات فيها شوية دم عرفت وقتها انو هذي هي السدادة المخاطية اللي يقولون عنها :( بس اللي هداني شوي انو ظهور هذي السدادة مو معناتها انو خلاص الحين ولادة ! لا لان ممكن الولادة تصير بعدها بكم ساعه او كم يوم وفي حالان توصل لاسبوع وهالكلام على ذمة قوقل :)
المهم رجعت نمت و بعدها جاتني الطلقة الثانية بعد ساعه و بعدين صارت تجي كل ربع ساعه ، وقتها ماكنت حابه اصدق انو هذا طلق ف اشغلت نفسي بكم شغله ببيتي وشيكت عالشنطه وبعدين صار الطلق يشتد مره وبين كل وحده والثانية عشر دقايق بس ، كلمت زوجي ورحنا الطوارئ وهذا خطأ مني لاني مفروض اروح لغرف الولاده فوق بس يالله .
دكتورة الطوارئ على حظي كانت جداً سيئة واخلاقها زباله وف***ا عورني وطريقة الفحص اللي كثير بنات مو عارفينها هي انو الدكتوره تدخل اصبعينها بس لداخل عشان تشوف كم سانتي انفتح الرحم ، لما تقولك الدكتوره بفحصك حاولي تتنفسين كويس ولاتركزين انها تدخل اصبعها تخيلي انو تدخل جهاز للفحص او ركزي باي شي ثاني وترا الموضوع كله ثواني ويمشي الحال 

خلصنا وطلعوني فوق طبعا قبل يقولون لك تشيلين ملابسك وتلبسين لبس المستشفى الازرق بس لاتنسين تكونين لابس شراب عشان شوي برد بالغرف 
وبغرف الولاده بالحبيب في تلفزيون شغليه عشان تهدين ع قناة القران واذكري ربك وادعي لكل اللي تحبينهم وكل ما جاك الطلق تنفسي 

#طريقة التنفس بسيطة ولاتتوقعين من دكتورتك تعلمك عالتفاصيل الصغيرةلازم انتي تثقفين حالك : التنفس تسحبين نفس من خشمك و تزفرينه من فمك وتدربي عليه من قبل واصلا مفيد لك حتى لو كنتي تسوين تمارين او اجهدتي نفسك بالشغل بالبيت ()


وصل القياس ل 9وشوي وبدوا الممرضات يحضرون الادوات وينادون الدكتوره 
جات دكتورتي وطمنتني انو كل شي تمام الحمدلله ولازم لما احس بالطلق اسوي بوش وادفع لتحت بدون صراخ وبدون ما افتح فمي وادخل هوا وشبهت ممرضتي الوضع كانك رايحه الحمام بعد مغص ( ان شاء الله شرحت كويس ) .

طلبت ابرة ظهر قالوا خلاص مايمدي اخذها وما احتاجها الحمدلله لاني وصلت 9 سانتي وابرة الظهر المعروف انهم يضربونها قبل 5 سانتي عشان كذا اذا انتي وصلتي 5 سانتي وحسيتي انو الالم محتمل او انك قادرة تتحملين ف بلاش منها 

حمى الطلق وخلاص انفتحت الرحم عالاخر وراس البيبي صار واصل لتحت جات الطلقه الاولى وسويت بوش لكن ما قدرت ورجعت حاولت عالطلقه الثانية و الثالثه وبهالوقت الممرضتين ع جوانب بطني ويقولون لي لما تسوين بوش ميلي جسمك لين يصير الدقن ملاصق للنحر جهة الصدر ( يعني كانك جالسه ومنحنيه لقدام ) وهذا الافضل ، الممرضتين ساعدني وضغطوا ع بطني وبالطلقه الرابعه نزل البيبي الحمدلله وحسيت بفرج ربي 

د.نائلة حطت ولدي ع بطني وللامانه خفت منه لان لونه ازرق وظهره علي ، لفته الممرضه وشفته وبعدها بكا وتنفس الحمدلله ، اتوقع لاني طولت بالاخير ف عشان كذا زرق يمكن 
شالوه ووده ع سرير الفحص وبعدها طلعت المشيمه بدون ما ادفع بس الممرضه ضغطت ع بطني وقالت لي دكتورتي لا تسوين شي ريلاكس 
وبعدين بدت دكتورتي تخيط مكان الجرح بس الله يهديها ما انتظرت لين ياخذ البنج مفعوله لاني طلبته بطبيعة الحال لانو ما راح اتحمل ! والدكتوره ما الومها كان عندها ضغط ولادات ع حظي يومها ، كنا 6 ولادات عند د.نائلة .
خلصنا من الخياطه و الحمدلله و نظفوا المكان وجلست بغرفة الولادة كم ساعة ( غرفة الولادة غير غرفتك اللي راح تباتين فيها للمعلومية ) .


حاولت اتذكر تفاصيل اكثر لكن هذا اللي طلع معاي و جد جد انصحكم بدكتورة نائلة فعلاً انسانه بروفيشنال و فاهمه وفوق كذا تخاف الله وتهمها راحة مريضتها


وبس ويارب أكون فدتكم ولو بشي بسيط وربي يسهل عالحامل و يكتب أجر الوالد والمرضع ويكتب أجر كل أمهاتنا ❤❤❤❤